Yamamaratyaya na yang Allahu Ta’ala yagapada yan ng nga kitab sang mga Nabi magunawa ng Tawraat, Injeel, Zaboor, Salmo aw yang sa uriyan magunawa ng Qur’an na tiyuturon sang Nabi Muhamad, sang kariko sini na kitab yagasugo ng pagsamba sang sambukbok nan na Allahu Ta’ala na way inagad nan. Yang kariko ng mga kitab na yani ya-aon yang pagbago ng lasak sang mga yalabay na mga panahon. Sabapan ng inang ng mga kalaban ng Agama Islam na yamangkamang ng tamok o kawasa ng mga otaw ng maatay na pamaagi. Yatabya yang Qur’an na ey-turon sang Nabi Muhamad. na kompleto na yama preserba sa sood ng mga pangatayan ng mga kaosgan, kawbayan aw mangaysu. Yani na Qur’an mu’jizah ng Allahu Ta’ala sang manusya na Yan mismo yang yaga proteksiyon sikon sang pagkawa atawa pagbago ng lasak sinyan na kitab. Ibarik Nan yang yamangkawa sang mga yama-una na mga kitab. Aw puno oman ng mga sayantipiko na ebedensiya na kiyakatigaman nilan sang panahon ta adon na yani challenge kanilan ng Allahu Ta’ala.

Yamamaratyaya na yang Allahu Ta’ala biyabaoy Nan si Nabi Adam sikon sang lupa, aw yan yang una na manusya na yamaka pasok sa Suruga. si Nabi Adam yababa sa dunya, aw yang kanan mga anak atawa kaliwat awon pagsubok kanilan. Paglabay ng madaig na panahon yang mga manusya yamangka tading, yang Shaytan yang yagatading kanilan sang pagsimba ng mga barhala. Sabap sini yang Allahu Ta’ala yagpada Yan ng mga Sugo atawa Nabi sikon sang mga manusya para ipasampay yang mensahe ng Allahu Ta’ala kanilan. Yang mensahe simbaon Yan na Allahu Ta'ala ng way inagad Nan, aw likayan yang pagsimba tuna pa sang Allahu Ta’ala. Sikon sang mga Nabi magunawa ni Nabi Nuh, Abraham, Mosa, Isha, aw sa uriyan kanilan, Nabi Muhammad, na selyo ng kariko ng mga Nabi "yang salawat aw salam ng Allahu Ta'ala nangot kanilan obos", di kaw amatawag na tidto na Muslim yatabya na pamaratyayan nan yang kariko ng mga Nabi na way pigabidan nila.

Yamamaratyaya na kariko ng yamangkahitabo sang dunya na yani sikon sang kagustohan ng Allahu Ta’ala, na yasulat da Nan bago pa man mahitabo yang kariko. Sabap sini yang otaw isugo Nan na maggaobok ng pag-'ibadah na yan yang-amanagot sang kanan mga ininang sa dunya na yani sampay sa allaw na mawri. Kailangan sang manusya maggaobok yan aw diyan magriklamo sang eqadar kanan ng Allahu Ta’ala. Maon kanan na di magduwaduwa, yang kanan pagpamaratyaya sini.